Мелеклер – ерде, коклерде, чевремизде ве эр ерде булуналар. Сайыларыны анджакъ Аллах биле. Эр бирине Аллах махсус вазифелер бергендир.
Базылары девамлы оларакъ Аллахкъа ибадет этелер. Базылары да кяинатнынъ тертип ве низамынен вазифелидир. Мелеклер пек кучьлюдир ве инсаннынъ такъаты етмейджек буюк ишлерни япарлар. Инсанларгъа яхшылыкъ телькъин эткен, оларны ярамайлыкътан къорчалагъан, къыйын вакъытларда муминлерге ярдымгъа ёлланылгъан мелеклер бар. Юдже Аллах мелеклерни яратып сонъсуз къудретини косьтергендир.
Буюк мелеклер ве вазифелери
1. Джебраиль – мелеклернинъ энъ буюгидир. Вазифеси: Аллахнен пейгъамберлер арасында эльчилик япмакъ, Аллахнынъ китапларыны пейгъамберлерге кетирмектир. Китабимиз Къуран-ы Керимни Аллахтан пейгъамберимизге кетирген Джебраильдир.
2. Микяиль – табиат адиселерини идаре этювнен вазифелидир. (Ягъмур ягъмасы, ель эсмеси, осюмликлернинъ осьмеси ве башкъа).
3. Исрафиль – къыяметнинъ къопмасы ве инсанларнынъ ольген сонъ текрар тирильмелеринен вазифели.
4. Азраиль – омюри сонъуна кельген инсанларнынъ джанларыны алмакънен вазифели.
Бу дёрт буюк мелеклерден гъайры шу мелеклер де бар:
Кирамен Кятибин – булар эки мелектир. Бириси инсанларнынъ сагъында, дигери инсанларнынъ солунда булуналар. Сагъындаки инсаннынъ япкъан эйи ишлерни; солундаки исе фена ишлерни яза. Бойлеликнен, эр бир инсаннынъ «Амель дефтери» бар. Бу дефтерге инсанларнынъ бутюн амеллери яни ишлери шу мелеклер тарафындан языла.
Мункер ве Некир – булар, ольген сонъ къабирде инсанларгъа суаль бермекнен вазифели эки мелек.
Ридван – дженнеттеки мелеклернинъ башы.
Малик – джехеннемде вазифели олгъан мелеклернинъ башы.
Булардан гъайры даа чокътан чокъ мелеклер бар. Ерлер ве коклер Аллахкъа седжде эткен мелеклернен толудыр.
Комментариев нет:
Отправить комментарий