Энъ эвель биз Аллахнынъ сонъсуз къудретини анълаймыз. Бизден башкъа Раббимиз чокъ махлюкъ яраткъан. Булар токътамадан Аллахкъа ибадет этелер; седждеге къапаналар, рукугъа баралар, Рабблерине тазим этелер. Бойлеликнен, Аллах Таалянынъ бизим ибадетлеримизге ихтияджы ёкъ. Аксине, бизим Аллахкъа ибадет этмеге ихтияджымыз бар. Бизлер эр ан Раббимизге мухтаджмыз.
Эр вакъыт ве эр ерде бизимнен берабер олгъан, бизден ич де айрылмагъан мелеклер бар. «Кирамен кятибин» деп айтылгъан бу мелеклернинъ вазифеси, япкъанымыз яхшылыкъ ве ярамайлыкъларны язмакътан ибарет. Демек, инсан озь башына къалгъанда биле ялынъыз дегиль. Оны даима козеткен ве япкъан ишлерини язгъан мелеклер бар.
Мелеклерге инангъан бир мусульман, гизли ерлерде «Мени кимсе корьмей, истегенимни япарым» деп оламаз, ярамайлыкъ япмаз. Чюнки, къайда олса олсун, мелеклернинъ оны козеткенини, яхшылыкъ ве ярамайлыкъларыны язып баргъанларыны билир. Бойлеликнен, мелеклерге олгъан иманымыз бизлерни феналыкъ япмакътан вазгечирир.
Булардан гъайры бизлерни ярамайлыкълардан къорчалагъан, эйилик япмагъа тешвикъат эткен мелеклер де бар. Дюньяда эйилик ве гузеллик мисали – мелектир; феналыкъ ве ярамайлыкънынъ мисали де – шейтандыр. Мелек инсанны яхшылыкъкъа, шейтан да феналыкъкъа чагъырыр.
Меселя, къурсагъы ач ве ярдымгъа мухтадж бир факъырнен къаршылашкъанымызда, ичимизде аджыма дуйгъусы догъар ве гизли бир сес бизге: «Факъыргъа ярдым эт», - дие сесленир. Бу мелек сесидир. Бу сырада ичимизде белли олгъан башкъа бир сес де: «Ярдым япсанъ акъчанъ эксилир, ярдым этме», - деп фысылдар ве бизни фукъареге ярдым этмектен вазгечирмеге тырышыр. Бу фысылты да шейтан сесидир.
Бу вазиетте биз факъыргъа ярдым этмеге чагъыргъан сеске уймалымыз. Чюнки бу сес, эйиликни севген ве бизни эйилик япмагъа чагъыргъан дост сесидир. Бунъа уймакъ бизге яхшы ишлер яптырыр, савап къазанмамызгъа себепчи олур. Шейтаннынъ сесине уймакътан сакъынмалымыз. Чюнки о, бизни яхшылыкътан вазгечирмеге ве гунях япмакъ ичюн алдатмагъа тырышыр.
Анълашыла ки, мелеклерге инанмакъ – феналыкътан сакъынмамызны, ахлякъымызнынъ гузеллешмесини теминлей.
Пейгъамберимиз -саллаллаху алейхи ве селлем- шойле буюра: «Эм шейтан, эм де мелек инсаннынъ юрегине базы шейлер кетирирлер. Шейтаннынъ иши феналыкъкъа чагъырмакъ, акъикъаттан узакълаштырмакътыр. Мелекнинъ иши акъикъаткъа, яхшылыкъкъа чагъырмакъ ве феналыкътан узакълаштырмакътыр.
Ким ичинде яхшылыкъкъа чагъыргъан бир сес эшитсе билсин ки, о – мелекнинъ сеси. Аман онъа уйсун ве Аллахкъа шукюр этсин.
Ким де ичинде феналыкъкъа чагъыргъан бир сес эшитсе билсин ки, о – шейтанынъ сеси. Ондан узакълашсын ве Аллахкъа сыгъынсын». Тирмизи
Комментариев нет:
Отправить комментарий