МЕЛЕКЛЕРНИНЪ МАИЕТИ ВЕ ХУСУСИЕТЛЕРИ

Иманнынъ шартларындан экинджиси мелеклерге инанмакътыр. Мелеклер нурдан яратылгъан варлыкълардыр. Олар ашамазлар, ичмезлер ве эвленмезлер. Оларнынъ къадын я да эркеклери олмаз, яни джынсиетсиздирлер.

Мелеклер Аллахнынъ севгили къулларыдыр. Олар Аллахнынъ эмирлерини ич бир эксиксиз ерине кетирелер, ич гунях ишлемезлер.

Юдже Аллах, бутюн махлюкъатны фаркълы шекиллерде яратты. Булардан базылары бизим корип оладжагъымыз, базылары да корип оламайджагъымыз шекильдедир. Инсан базы махлюкъларны корип оламай. Чюнки инсаннынъ козю эр шейни кореджек шекильде яратылмагъандыр. Яни инсаннынъ корюв къабилиети сынъырлыдыр.

Меселя, пек уфакъ шейни – микробны корип оламагъанымыз киби аваны, ельни, рухумызны ве акъылымызны да корип оламаймыз. Тельден кечкен электрик джерьяны да корюльмей. Лякин корьмесек биле, бизлер бу шейлернинъ бар олгъаныны билемиз. Иште, мелеклер де бунынъ киби бар олгъан, амма корюльмеген варлыкълардыр.

Мелеклер нурдан яратылгъан пек лятиф бир варлыкъ олгъанлары ичюн биз оларны корип оламаймыз. Факъат мелеклернинъ барлыгъына инанамыз. Чюнки, мелеклернинъ барлыгъы акъкъында Аллах Тааля Къуран-ы Керимде хабер берди. Пейгъамберимиз де мелеклерни эм корьди, эм де бизлерге бильдирди. Юдже Аллахнынъ ве севгили Пейгъамберимизнинъ бильдирген эр шей догърудыр. Бу себепнен биз мелеклернинъ бар олгъанына къатийен инанамыз.