Мустакъиль окъув ичюн

Керчек иман саиби бир генч къыз…

Хазрети Омер халифелиги девринде сют саткъанларгъа сютке сув къарыштырмаларыны ясакълады ве бу эмирни эр тарафкъа илян этти. Шеэрнинъ интизамыны тешкермек ичюн бир гедже Мединени айланып юргенде болдура ве бир аз раатланмакъ ичюн бир эвнинъ диварына яслана. Эвнинъ ичинде бир къызнен анасы арасында кечкен шу къонушманы эшите:

Ана:

- Айды къызым, тур да сютлерге бир аз сув къош.

Къыз:

- Халифенинъ сютлерге сув къошмакъны ясакъ эткенини бильмейсинъми?

Ана:

- Эльбетте билем.

Къыз:

- Ойле исе халифенинъ ясакъ эткен шейни насыл япарым?

Ана:

- Тур да сувны къош шу сютлерге, Омер сени къайдан кореджек?

Къыз:

- Омер корьмез, амма Раббим корер. Валлахи, мен Онынъ хошуна кетмеген бир шей япмам.

Хазрети Омер, бу къонушманы динълеген сонъ эвине къайтты. Эйи бир дин тербиеси корьген бу юксек ахлякълы фукъаре къызны огълу Асымгъа эвлендирди.

Иште, Аллахкъа инанувнынъ инсан арекетлерине мусбет тесири…