Кябенинъ Аллах тарафындан къорчаланмасы…

 Кябе Аллахкъа ибадет макъсадынен ер юзюнде япылгъан ильк ибадетханедир. Аллахнынъ эмиринен Хазрети Ибрахим ве Хазрети Исмаил тарафындан япылгъандыр. Арабистаннынъ Мекке шеэринде булунгъан Кябе, тарих бою мукъаддеслигини девам этмекте, инсанларнынъ дикъкъатыны озюне джельп этип кельмекте.

Ислямдан эвель Кябе, путперест араплар тарафындан путларнен толдурылып, япылув макъсадынынъ тышында къулланыла эди. Пейгъамберимиз -саллаллаху алейхи ве селлем-нинъ 630 сенеси Меккени фетх этмесинен Кябе путлардан темизлене.

Ислямиеттен эвель Мекке, арапларнынъ тиджарет меркези эди. Кябени зиярет этмек макъсадынен бир чокъ инсан эр сене Меккеге келе эди.

Йемен валиси Эбрехе, Кябени зиярет этмеге кеткен халкъны кенди улькесине джельп этмек макъсадында Сана шеэринде буюк бир табынув ери яптыра. Лякин халкъны Кябеден вазгечирип оламай. Бунынъ узерине Эбрехе Кябени йыкъып, ёкъ этмеге къарар бере. Филлернен къуветлендирильген бир ордунен арекетке кечип, Мекке якъынларына келе. Ордунынъ огь къысмында буюк бир филь булуна эди.

Меккелилернинъ бу ордугъа къаршы къояджакъ кучьлери ёкъ эди. Орду арапларгъа аит малларны ве айванларны ягъма этип Эбрехеге кетире. Ягъма этильген маллар арасында Пейгъамберимиз -саллаллаху алейхи ве селлем-нинъ дедеси Абдульмуталлибнинъ де 100 девеси бар эди. Мекке халкъындан бир эйет риджада булунмакъ ичюн Эбрехенинъ янына кете. Эйетте Абдульмуталлиб де бар эди. Эбрехе не ичюн кельгенлерини сорай. Абдульмуталлиб девелерининъ къайтарылмасы ичюн кельгенлерини айта. Бунынъ узерине Эбрехе:

 «Мен белледим ки, «Кябени йыкъма», - деп ялвармагъа кельдинъиз. Сиз исе девелеринъизнинъ дердиндесинъиз». Абдульмуталлиб Эбрехеге шу джевапны бере:

«Мен девелернинъ саиби олам, оларны истейим. Кябенинъ саиби бар, оны саиби къорчалар».

Эбрехе девелерни Абдульмуталлибге къайтара, сонъра Кябени йыкъмакъ ичюн арекетке кече. Энъ огде буюк бир филь бар эди. Кябеге якълашкъанда бу филь бир адым огге кетмей. Арткъа чевирильсе кете‚ лякин Кябеге чевирильсе кетмей. Аскерлернинъ бутюн арекетлерине бакъмадан фильни Кябе тарафына юрютмекнинъ чареси тапылмай.

Тамам бу сырада бекленильмеген бир адисе юз бере. Къаердендир бир сюрю къуш пейда ола ве филь ордусынынъ узеринде учмагъа башлай. Бу къушлар, агъызларында ве аякъларында ташыгъан уфакъ ташларны бир бомба киби аскерлернинъ узерине ягъдырмагъа башлайлар. Ташларнен урулгъан аскерлернинъ вуджутлары тельме-тешик ола ве бойледже, орду къыскъа вакъытта перишан олып дагъыла. Кябе йыкъылмакътан къорчалана. Эбрехе джаныны зорнен къуртарып, улькесине къайта ве бир муддет сонъра анда оле. Абдульмуталлибнинъ айткъаны киби, Кябени онынъ саиби Аллах къорчалай.

Инсанлар тарафындан къорчаланамагъан Кябени йыкъмакъ ве батыл инамларны девам эттирмек истегенлерни Юдже Аллах шойле джезаландыра. Кябени йыкъмаларына изин бермей. Чюнки якъын арада Аллахнынъ севгили къулу Хазрети Мухаммед -саллаллаху алейхи ве селлем- дюньягъа келеджек эди. 571 сенси мейдангъа кельген бу адиседен кърарнен 50 кунь сонъра Пейгъамберимиз Хазрети Мухаммед -саллаллаху алейхи ве селлем- догъа.