Акъыл, Аллахнынъ инсанларгъа берген буюк бир ниметидир. Инсан яхшыны ве ярамайны бири-биринден акъыл васытасынен айыра. Акъыл – инсанны башкъа джанлылардан айыргъан энъ буюк хусусиет.
Динимизде мукеллеф олмакъ ичюн акъылы еринде олмакъ шарт. Иман ве ибадетлерде къыдырылгъан биринджи шарт акъыл. Акъылы еринде олмагъанларнынъ диннинъ эмирлеринден месулиетли олмамасы акъылнынъ Ислям дининдеки эмиетини косьтере. Анджакъ, акъылнынъ керчек къыйметини булмасы ве инсан ичюн файдалы олмасы, оны яхшы къулланмагъа багълы. Акъылыны яхшы къулланмагъанлар, Къуран-ы Керимде тенбиеленелер. Акъыл энъ эмиетли бильги васыталарындан биридир.
Ислям дини акъылгъа олгъаны киби бильгиге де буюк бир къыймет бере, даима окъумакъны ве огренмекни эмир эте. Къуран-ы Керимнинъ ильк энген аетининъ «Окъу» эмринен башлагъаны, бизге окъуманынъ эмиетини ачыкъ бир шекильде косьтере. Илимге ве илим саиплерине берильген къыймет мевзусында Юдже Аллах шойле буюра:
«Де ки: Ич бильгенлернен бильмегенлер бир олурмы?»Зумер суреси, 9
Пейгъамбер Эфендимиз де илим огренмекнинъ мусульманлар ичюн эмиетли бир вазифе олгъаныны бильдирип, шойле буюра: «Илим огренмек эркек ве къадын эр мусульмангъа фарздыр».Мишкат-уль Месабих
Динимизнинъ бу эмирлерине уйгъун оларакъ баба деделеримиз илимге чокъ къыймет бергенлер, бильгили инсанларгъа да буюк сайгъы косьтергенлер.
Комментариев нет:
Отправить комментарий