Аллахны яхшы таныгъан талебе

Бир оджанынъ чокъ талебеси бар экен. Факъат буларнынъ ичинден бир данесини оджа башкъаларындан зияде севе экен. Дигер талебелер буны дуялар ве аркъдашыны куньлемеге башлайлар.

Куньлерден бир кунь дерске топлангъанлары вакъыт, талебелер оджасына шойле айталар:

- Оджа, мумкюн олса биз сизге бир суаль бермеге истеймиз…

- Буюрынъыз, - дей оджа. Талебелер девам эте:

- Оджа, биз эпимиз сизинъ талебелеринъизмиз, амма не ичюндир фелянчаны башкъалардан даа чокъ севесинъиз, бунынъ себеби недир? Оджа чокъ тюшюнмеден шойле дей:

 - Мен сизден бир шей япманъызны истейджем ве сонъра, Аллах къысмет этсе, суалинъизнинъ джевабыны береджем, - дей. Талебелер разы олалар, ве оджа оларгъа шойле айта:

- Эр биринъиз бирер къуш тутып, ич бир кимсе корьмейджек бир ерде оны сойып кетиреджексинъиз.

Талебелер вазифени беджермек ичюн даркъалалар. Акъшам кене оджанынъ узурында топланалар ве оджа олардан туткъан къушларыны къаерде сойгъанларыны сорай. Бириси ормангъа барып сойгъаныны айта, экинджиси деренинъ ичине тюшип, учюнджиси къобагъа кирип сойгъаныны икяе эте ве иляхре. Оджанынъ севгили талебесине сыра кельгенде, оджа ондан сорай: «Я сен огълум, айтылгъан шейни къайда барып яптынъ?» Талебе джевап бере:

- Оджа, сиз кимсенинъ коремейджек бир ерде буны япмакъны сёйлединъиз. Мен де чокъ тюшюндим, амма ойле бир ер тапалмадым. Чюнки къараныкъ орманнынъ ортасына барсам да, къобагъа кирсем де, яни къайда сакълансам сакъланайым, Аллах мени эр ерде коре. Ондан сакъланмакънынъ ве гизленмекнинъ чареси ёкъ. Онынъ ичюн мен берген вазифенъизни беджерип оламадым.

Оджа: «Аферин санъа, Раббисини акъикъатен таныгъан мусульман бойле тюшюнмели», - деди. Ондан сонъ эр кес талебенинъ фазилетини ве оджанынъ онъа не ичюн бойле юксек къыймет кескенини анълады ве ярамай тюшюнджелерден вазгечти.

Нетидже.

Иште, бу акъыллы талебе киби биз де Аллахны яхшы танып, Оны эр шейден юксек тутмакъ борджлумыз. Раббимизнинъ бизим эр ал ве арекетимизни эр даим корьгенини ве эр сёзюмизни эшиткенини эр вакъыт акъылда тутып, яхшы ишлер, яхшы сёзлер айтмагъа тырышмакъ керекмиз.