Аллах бизге корьмек ичюн козьлер, эшитмек ичюн къулакълар, лаф этмек ичюн тиль, чешитли ишлер беджермек ичюн эллер ве аякълар берди. Бундан да гъайры Аллах бизге акъыл берип, башкъа варлыкълардан устюн яратты.
Сагълыкъ ве сеадет ичинде яшамамыз ичюн ер юзюни чешит ниметлернен донатты, нефес алгъанымыз авадан, ичкенимиз сувгъа къадар эр тюрлю ихтияджларымызны къаршылады. Къыскъа бир муддет нефес аламагъан я да чыкъарамагъан инсан яшап оламаз, олер. Эр сание мухтадж олгъанымыз бу ве даа башкъа ниметлерни тюшюнсек, Аллахнынъ бизге берген эйиликлернинъ не къадар чокъ олгъаныны анъламамыз мумкюн.
Юдже Аллах шойле буюра:
«Аллахнынъ ниметини саяджакъ олсанъыз, битирип оламазсынъыз». Ибрахим суреси, 34
Инсан кендисине яхшылыкъ япкъанларны север. Ойле исе, энъ чокъ севмемиз керек олгъан варлыкъ – Аллахтыр. Чюнки О, бизге эр кестен чокъ, атта сайылмайджакъ къадар чокъ яхшылыкъ япкъандыр. Энъ эвель бизлерни яраткъан ве яшаткъандыр. Корюле ки, Аллах бизлерге нисбетен пек мерхаметли ве шефкъатлыдыр. Биз де Аллахны пек севмелимиз. Севги ялынъыз сёзнен олмаз. Инсан севдигине сайгъы косьтерир, севдигининъ бегенмейджеги бир шей япмаз. Аллах севгиси Онынъ мубарек адыны урьметнен анъмакъ, бизлерге эмир эткен ибадет вазифелерини севе-севе япмакъ ве ясакъ эткен шейлерден сакъынмакънен олур.
Эгер бойле япып, Оны керчектен севгенимизни косьтерсек (исбат этсек), Аллах да бизни севеджек ве дюньядаки ниметлерден даа зиядесини бизге ахыретте береджек.
Бир инсан ичюн энъ буюк бахт, Аллахнынъ севимли къулларындан олмакътыр
Комментариев нет:
Отправить комментарий